नेपाली रोजगारीको खोजीमा १७३ मुलुकमा पुगे

पुष १८ ।काठमाडौँ – रोजगारी र अवसर खोज्दै एक दशकको अवधिमा संसारका १ सय ७३ वटा मुलुकमा नेपाली पुगेका छन् । ती मुलुकमा ६० लाख ९८ हजार ८० जना नेपाली श्रमिक पुगेको वैदेशिक रोजगार विभागको तथ्यांक छ । उक्त संख्या भारत बाहेकको हो ।

विदेश जानेमा ५६ लाख ८१ हजार ६ सय २७ पुरुष र ४ लाख १६ हजार ४ सय ५३ महिला छन्  । सन् २०१४ जनवरी १ देखि २०२४ को जुलाई १६ सम्म वैधानिक रूपमा श्रम स्वीकृति लिई गएकाहरुको तथ्यांकका आधारमा विभागले उक्त जानकारी दिएको छ ।

व्यक्तिगत पहुँच वा अन्य उपायबाट विभागसँग श्रम स्वीकृति नलिइ गएकाको संख्या सरकारी अभिलेखमा भने छैन । विभागका प्रवक्ता गुरुदत्त सुवेदीले व्यक्तिको पहुँच बढ्दा नेपाली विश्वभर छरिएका बताए ।

विभागका अनुसार सबैभन्दा बढी कतारमा १६ लाख ६ हजार ५ सय २१ जना नेपाली पुगेका छन् । सबैभन्दा कम सुरिनाममा एक जना मात्र पुगेको देखिन्छ । २०७८ को जनगणनाअनुसार २२ लाख मात्र नेपाली देशबाहिर रहेका छन् ।

अन्तर्राष्ट्रिय श्रम संगठनको प्रतिवेदनअनुसार विश्वभरका आप्रवासी श्रमिक युरोपको उत्तरी, दक्षिणी र पश्चिमी क्षेत्र, उत्तरी अमेरिका र अरब देशमा केन्द्रित हुन थालेका छन् । प्रतिवेदनअनुसार सन् ०२२ सम्ममा यी क्षेत्रमा आप्रवासी श्रमिकको संख्या बढेर २३.३ प्रतिशत पुगेको छ ।