बझाङमा आमाको मृत्युमा बेहोस भएकी छोरीको पनि मृत्यु

पुस १६ ।बझाङ–दुर्घटनामा परेर आमाको मृत्यु भएको शोकमा विक्षिप्त छोरीको पनि मृत्यु भएको छ । गत शनिबार थलारा गाउँपालिका–९, आमबगरकी ४१ वर्षीया पञ्चमाला जोशीको बाटोमा हिँडिरहेका बेला सडकबाट खसेको ढुंगाले लागेर मृत्यु भएको थियो । आमाको मृत्युपछि २५ वर्षीया छोरी रोहिणी जोशीको पनि मृत्यु भएको छ ।

आमाको दुर्घटनाको खबर सुन्नेबित्तिकै धनगढीमा रहेकी रोहिणी आइतबार साँझ बझाङ पुगेकी थिइन् । आमाको पार्थिव शरीर देख्ने बित्तिकै बेहोस भएकी रोहणीको मृत्यु भएकाे आफन्त विश्वप्रकाश जोशीले बताउनुभयो ।

बेहोस भएपछि स्वास्थ्यकर्मी बोलाएर घरमै उपचार गराएपछि केही बेर होसमा आएकी रोहणी फेरि बेहोस भएकी थिइन् । बेहोस अवस्थामै जिल्ला अस्पताल चैनपुर पुर्याएकी उनलाई अस्पताल पुञ्ययाउनेबित्तिकै चिकित्सकले मृत घोषणा गरेको जोशीले बताए ।

आमाको अन्त्येष्टि नहुँदै छोरीको पनि मृत्यु भएको हो । सोमबार साँझ सेती नदीको आमबगर घाटमा आमाछोरीको एकैपटक दाहसंस्कार गरिएको छ । आमाछोरीको मृत्युसँगै गाउँ शोकमा डुबेको छ । दुई दशकदेखि महिला स्वास्थ्य स्वयंसेविकाका रूपमा कार्यरत पञ्चमाला र उनकी छोरी छोरी रोहिणीको मृत्यु भएपछि गाउँ शोकमा डुबेको हो ।

१५ दिनअघि मात्रै रोजगारीका क्रममा दुबई पुगेका जगतप्रशाद जोशी श्रीमतीको मृत्युपछि घर पुग्न नपाउँदै छोरीलाई समेत गुमाउँदा भावविह्वल बनेका छन् ।